Mərifət İnciləri

“Mərifət inciləri” AMİN İctimai Birliyinin 2020-ci ildən etibarən nəşr etdiyi rüblük ədəbi-irfani məcmuədir. Məcmuə ümumi və xüsusi saylarda çap olunur. Ümumi saylar daha çox divan və təsəvvüf ədəbiyyatına dair mətnləri ehtiva etdiyi halda, xüsusi saylar Azərbaycanın milli inkişafında müstəsna xidmətləri olmuş şəxsiyyətlərə həsr edilir. Məcmuənin indiyə qədər iki ümumi, iki xüsusi sayı nəşr olunmuşdur. Xüsusi saylar Füzulişünas alim, şair Hacı Mail Nardaraniyə, görkəmli şair Dahi Almaslıya və şəhid Teymur Allahverdiyevə ithaf edilmişdir. Ümumi saylarda şeriyyatda işlənən söz və məna gözəlliklərinin (mühəssinat) şərhindən ibarət “Şer bir zivərdir”, divan ədəbiyyatında rast gəlinən qədim türk mənşəli sözlərin tarixi-etimoloji təhlilini əhatə edən “Ver sözə ehya”, habelə, bədii tərcümənin nəzəri məsələlərindən bəhs edən “Tərcümandır söz” bölmələri mövcuddur. Dərginin təsisçisi Seyyid Əsri, redaktoru Məhəmməd Nuridir.