Seyyid Əsri – AMİN İctimai Birliyinin sədri

Heydərli Məcid Seymur oğlu 15.03.1994-cü il tarixində Bakı şəhərində anadan olub. Əslən Qarabağ seyyidlərindəndir. 2000-2011-ci illərdə Bakı şəhəri, Xəzər rayonu, Binə qəsəbəsində yerləşən S. Abbasov adına 117 saylı orta məktəbdə təhsil alıb. 2011-ci ildə Bakı İslam Universitetinə daxil olub, 2015-ci ildə həmin universiteti “Dinşünaslıq” ixtisası ilə bitirib.

On dörd yaşından Seyyid Əsri ədəbi imzası ilə əruz vəznli şe’rlər yazır. Mərhum Füzulişünas şair Hacı Mail Əliyevin ən xas yetirməsi olan ustad Seyyid Ümminin tələbəsidir.

2017-ci ildən AMEA-nın Məhəmməd Füzuli adına Əlyazmalar İnstitutu ilə mətnşünaslıq yönündə müstəqil surətdə əməkdaşlıq etməkdədir. “Səməd Mənsur. Şeirlər, felyetonlar, pyeslər” (“Şərq-Qərb”. 2020) kitabının həmmüəllifi (mətnşünas alim Sona Xəyal ilə), “Kərbəlayi Muxtar Bisəvad. Əsərlər” (2017), “Mirzə Ağadadaş Müniri. Əsərlər” (2018), “Məhəmməd Nidai. Kitabi-tibbi-mənzum” (2019) kitablarının redaktorudur.

Ərəb və fars dillərindən klassik ədəbiyyat nümunələrinin mənzum tərcüməsi ilə məşğuldur. “Dünya ədəbiyyatı” dərgisinin 2016-cı ildə nəşr olunan “Oman ədəbiyyatı” buraxılışındakı mənzum tərcümələrin müəllifidir. Həmçinin “Ədəbiyyat” qəzetində Seyyid Məhəmmədhüseyn Şəhriyarın qəzəlləri (25.11.2017 №42-43 (5113/14)) və omanlı şair Şeyx Hilal əs-Siyabinin qəsidəsi mənzum tərcüməsində çap edilib (27.01.2018 №3 (5126)). “Mə’rifət inciləri” ədəbi-irfani məcmuəsinin ilk sayında gedən Şeyx Əttar Nişapurinin “Əsrarnamə” məsnəvisinin münacatından bir hissənin bədii tərcüməçisidir (2020 №1). 2025-ci ildə “Fidan çiçəkləri” adlı kitabı nəşr edilmişdir.

26.05.2025 tarixində BDU-nun Şərqşünaslıq fakültəsində Azərbaycan xalqının Ümummilli Lideri Heydər Əliyevin anadan olmasının 102-ci ildönümünə həsr olunmuş gənc tədqiqatçı və magistrantların “Şərq filologiyası məsələləri” mövzusunda respublika elmi konfransında “Divan ədəbiyyatımızdakı müqəddəs əmanət – EŞQ” adlı mə’ruzə ilə çıxış edib.

Mütəmadi olaraq elmi və dövri mətbuatda divan ədəbiyyatı və bəlağət fənləri, fəlsəfə, cəmiyyətşünaslıq və s. mövzularda tədqiqi məqalələri dərc edilir. 2021-ci ildən BDU Elmi Kitabxanasının baş biblioqrafı vəzifəsində çalışır.

Hazırda Azərabaycan Milli İnkişafı Naminə (AMİN) ictimai birliyinin sədri, birliyin layihələrindən olan “Mə’rifət inciləri” adlı ədəbi-irfani məcmuənin tə’sisçidir.

Duta bilmürkən o Şirin ü bu Leyla ətəgin
Dutdı Fərhad ilə Məcnun dağ ü səhra ətəgin

Ey mən eyvaninə heyran görün kəlmələşək
Musiyəm əglənürəm Turi-təcəlla ətəgin

Eşq baş çəksə salar hüsn ayağa Yusifinin
Dutdı öncə yaxasın sonda Züleyxa ətəgin

Vəh nə məhşərdü bu ihya gecəsi məsciddə
Yenə çəkmiş başına vaizi-rüsva ətəgin

Dürdi qalxar yüzinə şur ilə çalxansa şərab
Dür çıxar yə’ni ki silkərsə bu dərya ətəgin

Öylə qapdım ətəgin ol qara donlu sənəmin
Haci qapmaz belə heç Kə’beyi-ülya ətəgin

Əsri yaşım silə bilməz fələki-ətləs də
Haşəlillah əlimdən üzə Mövla ətəgin

***

Qələm istər ki xətün hərf ilə etsün tə’rif
Yoxmı vəhmi bu hərifin edə nagəh təhrif

Yaslanam kölgənə derdim günəş üzlü sərvim
Zərrəcə kölgəsi yoxmış qədinin öylə lətif

Baş qoyub səcdə edəm derdim ayağın izinə
Yoluna qoymaz imiş iz qədəmün onca xəfif

Yüz sənəm gər məni min dinə çəküb leyk mənə
Eşqinin gözləməgim şər’in olub dini-hənif

Əgər əğyarin əlindən edər olsan hicrət
Gəzmə bir ğeyr mədinə könülə ver təşrif

Nur me’racinə getdün güni ayi ötdün
Bəşər etməz mələkim hüsnüni kamil tövsif

Qalibi-şe’rimə can zikridü Əsri yoxsa
Nəmə lazimdü ki boş qafiyə vü vəzn ü rədif

***

Ümid bəxş et İlahi vüsal üçün bu səhər
Fəraqə son səhər olsun məlal üçün bu səhər

Özün tikanə vurar duysa binəva bülbül
Həzin nəvamı gülən gül cəmal üçün bu səhər

Şirin-şirin dodağınçün yazanda vəsf qələm
Arı görüb bayılar çıxsa bal üçün bu səhər

İki göz istər edə seyr şehli nərgis tək
Gözündə eynəki cah ü cəlal üçün bu səhər

Səlamı gün kimi doğdu səbadı söyləyərdim
O can verən necəsən tək sual üçün bu səhər

O gün gələ görüşə də’vət eyləyim o gülü
Desin haçan deyim onda misal üçün bu səhər

Fidanı söyləsin ey Əsri mən səni sevirəm
Uğurlu çağdır İlahi məcal üçün bu səhər