Əliyev Məhəmməd Mahir oğlu 9 noyabr 2008-ci ildə Bakı şəhərində dünyaya gəlmişdir. Əslən Bakının Qala kəndindəndir. 16 nömrəli Texniki-Humanitar Liseyi bitirib. Azərbaycan Dövlət Pedaqoji Universitetində “Riyaziyyat və informatika müəllimliyi” ixtisası üzrə təhsil alır. AMİN ictimai birliyinin üzvüdür.
MÜXƏMMƏS
Könül o qarəsaçı Kəbeyi-Ülya bildi
Kuyini dövr eləyib cənnəti-mə’va bildi
Baği-cənnətdə onu bir güli-rə’na bildi
Eşqdən qeyri nə var dəhrdə xülya bildi
Nə bu dünya qəmini nə qəmi-üqba bildi
Əqli gör Həq onu hər elmdə aqil yaradıb
Hüsnü gör cümlə cəhanı ona mail yaradıb
Eşqi gör aləmin hər cövrünə qail yaradıb
Gör onu Xaliqi-Yekta necə kamil yaradıb
Özünə Həqq Rəsulu onu həmta bildi
Bir əyaq içrə ərəq ilə dönə məstə könül
Guşeyi-yarə fəraz eyləyə peyvəstə könül
Gər ona rast gələ şurə gələr xəstə könül
Bu məqam içrə nəva eyləyib ahəstə könül
Özün üşşaq ara bir bülbüli-şeyda bildi
Nöqteyi-badı yığan nuruna pərvanələri
Nöqtədir başına cəm eyləyib əmma nələri
Bu müəmmanı bilər aşiqi-divanələri
Yığ tök ətrafə bütün aqil ü fərzanələri
Kim deyər ki nədir o sirr ü müəmma bildi
Nöqteyi-banı danan mə’niyi-Qur’an nə bilir
O mələksurəti bəs xadimi-şeytan nə bilir
Mədəni yorma özün fazili nadan nə bilir
Qeyri mövlanı sevən eşq ilə iman nə bilir
Aşiq ol kəsdir onu kəndinə Mövla bildi
MƏSNƏVİ
Ey dost sənə deyim hekayət
Bir mahdən eyləyim şikayət
Ay adicə cismdir səmadə
Hamı kimi ömr edirdi sadə
Gündən ki o nurunu alırdı
Əks etdiribən yerə salırdı
Lakin itirib həyanı bir gün
Saydı özünü Günəşdən üstün
Mən söylədi ali qibləgahəm
Bundan sora asimanə şahəm
Qılsın gərək hamı mahə təzim
Etsin özünü yolumda təslim
Eşq əhli mənə gətirsin iman
Eşqimlə yaza söz əhli divan
Eşqim ilə tarzən çala tar
Tar eşqlə zar edə nəyi var
Mən nur saçan bu aləmə şəm
Aləm bura dövr üçün olub cəm
Hamı başıma təvaf eylər
Aləm belə inkişaf eylər
Tərif ilə doymayıb nəhayət
Tən ilə günəşdən açdı söhbət
Var təkcə dedi Günün qüruru
Lazım deyil heç onun o nuru
Böylə bu vəfasız oldu sultan
Yer əhli ona gətirdi iman
Şair yenə vəsf edib ol ayı
Yoxdur dedi asimanda tayı
Tar isə səda salıb cahanə
Tərif ilə şahi-asimanə
Xanəndə də oldu mahə məddah
İcad elədi təraneyi-mah
Hamı dedi o gədayə tərif
Bax böylə həqiqət oldu təhrif
Bir gün Günəş oldu işdən agah
Öyrəndi ki padşah olub mah
Hirs ü qəzəb ilə odda yandı
Lakin düşünüb biraz dayandı
Olmaz dedi iş görəm əsəblə
Dərsini gərək verim ədəblə
Mah ilə məsafəsini çözdü
Tüm cismləri sırayə düzdü
Ayın üzünə o saldı sayə
Ta nuru yetişməsin ki Ayə
Ayın da yavaşca nuru söndü
Əvvəlcə kiçik hilalə döndü
Sonra da təmam gözdən itdi
Bax böyləcə o zəvalə yetdi
Ey dost kimə edərsən imdad
Sən gözləmə ki səni edər şad
Yer əhli kimi gədanı tutma
Kim yaxşılıq eyləsə unutma
İş görməginən həmi qəzəblə
Biganəyə ver cəvab ədəblə
Batma Mədəni daha günahə
Tay tutmaginən gədanı şahə
Şərh Yaz